რეზიუმე

კოლიმბარის კუნძულზე სამონასტრო კომპლექსი აშენდება 

კოლიმბარის კუნძულზე, რომელიც პალიასტომის ტბასა და მდინარე კაპარჭას შორის მდებარეობს, მალე პალიასტომის ღვთისმშობლის სახელობის მამათა მონასტერი აშენდება. დღეს კოლიმბარზე სამონასტრო კომპლექსის ტერიტორია ეკურთხა. დეკანოზმა თევდორემ ღვთისმშობლის სახელზე პირველი პარაკლისი აღავლინა. გადმოცემის თანახმად, იქ სადაც ამჟამად პალიასტომის ტბაა, ადრე მჭიდრო დასახლება იყო და პავლეს ტომი ცხოვრობდა. ხოლო ტბის შუაგულში პალიასტომის ღვთისმშობლის ტაძარი იყო, რომელიც ტბაში ჩაიძირა. ეკლესიის ნანგრევები ტბის შუაგულში დღესაც არსებობს, სწორედ მისი აღმოჩენის შემდეგ გაჩნდა იდეა, კუნძულ კოლიმბარზე ტაძარი აშენებულიყო.
მოსამზადებელი სამუშაოები დღეიდან დაიწყო. წმინდა ადგილის მოლოცვა შორეული ქვეყნებიდან ჩამოსულ პილიგრიმებსაც შეეძლებათ. სამონასტრო კომპლექსს 5 ჰექტარი ტერიტორია დაეთმობა, სადაც მამებს საკუთარი მეურნეობაც ექნებათ.