სოციალურად შეჭირვებული ფენის სამედიცინო დაზღვევას ფოთში კომპანია „ირაო“ განახორციელებს

სოციალურად შეჭირვებული ფენის სამედიცინო დაზღვევას ფოთში სადაზღვევო კომპანია „ირაო“ განახორციელებს. 
კომპანია სპეციალურად შექმნილმა კომისიამ შეარჩია. როგორც ირკვევა, „ირაოს“ მიერ წარდგენილ პაკეტში კომისიისთვის მიმზიდველი მშობიარეთა დაფინანსების პირობა აღმოჩნდა. სადაზღვევო კომპანია „ირაო“ ვალდებულებას იღებს თითეული შეჭირვებული ორსული 400 ლარით დააფინანსოს. 
როგორც “რეზიუმეს“ ფოთის ჯანმრთელობისა და სოციალური დაცვის სამსახურში განუცხადეს, სოციალურად შეჭირვებული ფენის სამედიცინო დაზღვევას ადგილობრივი ბიუჯეტიდან 85 –ათასი ლარი მოხმარდება. პროგრამა 800 ადამიანზეა გათვლილი. სადაზღვევო კომპანია, რომელიც მიმდინარე წლის აპრილის თვიდან დეკემბრის ჩათვლით სოციალურად შეჭირვებულ ადამიანებს მოემსახურება, ფასთა კოტირებით შეირჩა.
სოციალურად დაუცველი ოჯახების ნუსხა ტერიტორიული მართვის ორგანოებმა ჯანდაცვის სამსახურში უნდა წარადგინონ.

არაბულმა კომპანიამ ფოთში განსახორციელებელი პროექტი შეაჩერა

არაბულმა კომპანიამ “გლობალ ჯენერალ თრეიდინგი”, რომელსაც ფოთში ზღვის სანაპიროზე დასასვენებელ-გასართობი კომპლექსი უნდა აეშენებინა, პროექტი შეაჩერა. ამის შესახებ “რეზიუმეს” ფოთის მაჟორიტარმა დეპუტატმა თეიმურაზ წურწუმიამ განუცხადა. 
არსებული ინფორმაციით, კომპანია კომპლექსის მშენებლობისთვის 2 მილიარდი დოლარის ინვესტიციის ჩადებას 5 წლის განმავლობაში აპირებდა, საიდანაც მიწის შეძენის ფასი 80 მილიონ დოლარს შეადგენდა. 
“პროექტი ამ ეტაპზე შეჩერებულია და არა გაუქმებული. ხელმოწერილია ხელშეკრულება, რომელიც მიწის შეძენას და მასში 80 მილიონი დოლარის გადახდას ითვალისწინებს. “გლობალ ჯენერალ თრეიდინგმა” ჩვენთან აქტიური თანამშრომლობა აგვისტოს ომის შემდეგ შეაჩერა”,-აცხადებს დეპუტატი.  
“გლობალ ჯენერალ თრეიდინგი” ერთ-ერთი არაბი შეიხის საკუთრებაა, კომპანია ფოთში ინვესტიციის ჩადებით 2008 წელს დაინტერესდა.

ფოთში გაზიფიცერების პროგრამა 2010 წელს დაიწყება

ფოთში გაზიფიცერების პროგრამა 2010 წელს დაიწყება და ორი წლის განმავლობაში დასრულდება, ამის შესახებ “რეზიუმეს” ფოთის მაჟორიტარმა დეპუტატმა თეიმურაზ წურწუმიამ განუცხადა.
“სოკარ ჯორჯია გაზი” ფოთის ბუნებრივი აირის 100%-იანი წილის მფლობელია. რეგულარულად ვაწარმოებთ მოლაპარაკებას “სოკართან” და როგორც გვეუბნებიან, კომპანიას თავის პერსპექტიულ გეგმაში ფოთში ბუნებრივი გაზის შემოყვანა დაგეგმილი აქვს 2010-12 წლებში. პირველ ეტაპზე იგეგმება 6 ათასი აბონენტის ჩართვა, ფოთის გაზიფიცირების პროცესი ორი წელი გაგრძელდება”,-აცხადებს წურწუმია.
ფოთს, ბუნებრივი გაზი დღემდე არ მიეწოდება, რაც “თავისუფალი ინდუსტრიული ზონის” განვითარებას მნიშვნელოვნად აფერხებს. ინდუსტრიული ზონის განვითარების ერთ-ერთ პრიორიტეტად სწორედ ქალაქში ბუნებრივი აირის შეყვანა სახელდება.

მე-2 საჯარო სკოლა გარემონტდება

იაკობ გოგებაშვილის მეგა პროგრამის ფარგლებში განათლებისა და მეცნიერების სამინისტრო ფოთში მე-2 საჯარო სკოლის გარემონტებას გეგმავს. სავარაუდოდ იგი მიმდინარე წლის სასწავლო პროცესის დასრულების შემდეგ დაიწყება და ახალი სასწავლო პროცესის დაწყებამდე უნდა განხორციელდეს. მე-2 საჯარო სკოლას 700 ათასი ლარის სარემონტო სამუშაოები ჩაუტარედება, განათლების სამინისტრო 2013 წლამდე საქართველოს მასშტაბით ყველა საჯარო სკოლის გარემონტებას ევრო სტანდარტების შესაბამისად გეგმავს.

ფოთმა ტრანსფერი მიიღო

ფოთმა ტრანსფერტის სახით, ცენტრალური ბიუჯეტიდან 2 მილიონ 250 ათასი ლარი მიიღო. ფოთის მერმა, საკრებულოს თანხის განკარგვის პროექტი უკვე გაუგზავნა. მერის მიერ ინიცირებული პროექტის მიხედვით, 7 ქუჩის კაპიტალური მოასფალტებისთვის წელს 2 მილიონ 100 ათასი დაიხარჯება, 100 ათასი ლარი მოხმარდება 7 მაღალსართულიან კორპუსში ლიფტების რეაბილიტაციას. 25 ათასი ლარით კი ავარიული მე-11 საჯარო სკოლის შენობა გადაიხურება. თუ რომელი ქუჩები მოასფალტდება მიმდინარე წელს და რომელ კორპუსში მოხდება ლიფტების რეაბილიტაცია ამას საკრებულოს კომისიები გადაწყვეტენ. როგორც `რეზიუმეს~ ფოთის საკრებულოში განუცხადეს, აქცენტი იმ ქუჩებზე გაკეთდება, რომელიც თავისუფალი ინდუსტრიული ზონისა და ფოთის პორტამდე მისასვლელ გზებს წარმოადგენს.